އިއްދައިގައި ދިމާވާ މައްސަލަތަކާއި، އުރަމަތި އަދި ރަހިމުގެ ކެންސަރާއި ގުޅޭ މުހިންމު މަޢުލޫމާތުތައް ހިމެނޭ ސެޝަނެއް އިސްރަށްވެހިންގެ ނާދީގައި ކުރިއަށް ގެންދިއުމަށް ހަމަޖައްސައިފި އެވެ.
އަންހެނުންނަށް ޚާއްސަކޮށްގެން ކުރިއަށް ގެންދާ މި ސެޝަން، ނަންގަވައިދެއްވާނީ ހުޅުމާލެ ހޮސްޕިޓަލްގެ ވެލް ވިމެން ކްލިނިކްގެ ފަރާތުން 11 ޖުލައި ވާ ބުރާސްފަތި ދުވަހުގެ ހަވީރު 16:15 އިން 17:45 އަށެވެ.
އުމުރުން ދުވަސްވާއިރު ދުޅަހެޔޮ ޞިއްޙަތެއްގައި ހުރުމަކީ ނުހަނު މުހިންމު ކަމެކެވެ. ވަކިން ޚާއްސަކޮށް އުރަމަތީ ކެންސަރާއި ރަހިމުގެ ދޮރަށް ޖެހޭ ކެންސަރު ފަދަ ބަލިތަކަކީ ދުރާލާ ދެނެގަނެވިއްޖެ ނަމަ ފަރުވާ ހޯދި ފަސޭހަވާ ބަލިތަކެއްކަމުން، މިފަދަ މައުލޫމާތުތައް ފޯރުކޮށްދިނުމަކީ މުހިންމުކަމެއް ކަމުގައި ވާތީ، އިސްރަށްވެހިންގެ ނާދީން ގެންދަނީ ސިލްސިލާ ގޮތެއްގައި މިފަދަ ތަފާތު މައުލޫތަކާއި ގުޅޭ ސެޝަންތައް ނަގަމުންނެވެ.
އިސްރަށްވެހިންގެ ނާދީގައި ކުރިއަށް ގެންދާ ކޮންމެ ހަރަކާތަކީ ވެސް ދޮށީއުމުރުގެ މީހުންގެ ނަފްސާނީ، ޖިސްމާނީ އަދި އިޖުތިމާއީ ދުޅަހެޔޮކަން ކަށަވަރުކުރުމަށް ކުރިއަށް ގެންދާ ހަރަކާތްތަކެކެވެ.
އެހެންކަމުން، އަންހެނުންނަށް ދިމާވާ ތަފާތު މައްސަލަތަކާއި ގުޅޭގޮތުން ކުރިއަށް ގެންދިއުމަށް ހަމަޖެހިފައިވާ މި ސެޝަންގައި ވީހާވެސް ގިނަ ބޭފުޅުން ބައިވެރިވެވަޑައިގަތުމަކީ އިސްރަށްވެހިންގެ ނާދީގެ ވަރަށް ބޮޑު އެދުމެއްކަމުގައި އެ ފަރާތުން ވަނީ ބުނެފައެވެ.
10 ޖުލައި 2024
04 މުޙައްރަމް 1446