މާޗް 2017ގައި ޖުމްލަ 279 މައްސަލަ ވަނީ މިނިސްޓްރީ އޮފް ޖެންޑަރ އެންޑް ފެމިލީއަށް ރިޕޯޓްކޮށް އެޓެންޑްކޮށްފައެވެ.
ކުޑަކުދިންނަށް ކުރާ އެކި ބާވަތުގެ އަނިޔާ
- ކުޑަކުދިންނަށް ކުރާ އެކި ބާވަތުގެ އަނިޔާއާ ގުޅޭ 142 މައްސަލަ ވަނީ ރިޕޯޓްކޮށްފައެވެ. މިއީ، މާޗް 2017ގައި ރިޕޯޓްކޮށްފައިވާ މައްސަލަތަކުގެ 50%އެވެ.
- މިފަދަ މައްސަލަތަކުގެ ތެރެއިން އެންމެ ގިނައިން ރިޕޯޓްކޮށްފައިވަނީ ކުޑަކުދިންނަށް ކުރާ ޖިންސީ އަނިޔާގެ މައްސަލަތަކެވެ.
ކުޑަކުދިންނަށް ކުރާ ޖިންސީ އަނިޔާގެ 50 މައްސަލަ ރިޕޯޓްކޮށްފައިވާއިރު، މީގެ ތެރެއިން 40 މައްސަލައަކީ ޖިންސީ އަނިޔާގެ ޝިކާރައަކަށް ވެފައިވާ އަންހެންކުދިންނާ ގުޅޭގޮތުން ހުށަހަޅާފައިވާ މައްސަލަތަކެވެ.
- މީގެ އިތުރުން މިބާވަތުގެ މައްސަލަތަކުގެ ތެރޭގައި އިހުމާލުވުމުގެ 41 މައްސަލަ؛ ޖިސްމާނީ އަނިޔާގެ 26 މައްސަލަ؛ ނަފްސާނީ އަނިޔާގެ 23 މައްސަލަ؛ އަދި ހަނގާކުރުމުގެ 1 މައްސަލަ ހިމެނެއެވެ.
ކުށް ކުރާ ކުޑަކުދިން
- އެކި ބާވަތުގެ ކުށް ކުރާ ކުޑަކުދިންގެ 10 މައްސަލަ މިނިސްޓްރީއަށް މިދިޔަ މަހު ވަނީ ހުށަހަޅާފައެވެ.
- މިފަދަ މައްސަލަތަކުގެ ތެރޭގައި މަސްތުވާތަކެތި ގެންގުޅުމުގެ 1 މައްސަލަ؛ ވައްކަންކުރުމުގެ 1 މައްސަލަ؛ ޖިސްމާނީ އަނިޔާކުރުމުގެ 1 މައްސަލަ އަދި މުދަލަށާއި ތަކެއްޗަށް ގެއްލުންދިނުމާ ގުޅޭ 1 މައްސަލަ ހިމެނެއެވެ.
ކުޑަކުދިންގެ އަޙްލާޤީ މައްސަލަތައް
- ކުޑަކުދިންގެ އަޙްލާޤީ މައްސަލަތަކުގެ 17 މައްސަލަ މިނިސްޓްރީއަށް މިދިޔަ މަހު ވަނީ ހުށަހަޅާފައެވެ.
- މިފަދަ މައްސަލަތަކުގެ ތެރޭގައި “ޓެމްޕަރ ޓެންޓްރަމްސް”އާ ގުޅޭ 10 މައްސަލަ؛ ގެއިން ފިލައިގެން ދިޔުމުގެ 3 މައްސަލަ؛ ގޯނާކުރުމުގެ 3 މައްސަލަ އަދި ހަނގާކުރުމުގެ 1 މައްސަލަ ހިމެނެއެވެ.
ހައްޤުތަކުން ކުޑަކުދިން މަހްރޫމްކުރުން
- ހައްޤުތަކުން ކުޑަކުދިން މަޙްރޫމްކުރުމާ ގުޅޭ 8 މައްސަލަ މާޗް 2017ގައި މިނިސްޓްރީއަށް ވަނީ ހުށަހަޅާފައެވެ.
- މިފަދަ މައްސަލަތަކުގެ ތެރޭގައި، ސިއްޙީ ފަރުވާ ފޯރުކޮށްނުދިނުމުގެ 4 މައްސަލަ؛ ސާފު ބޯފެނާއި ކަރަންޓު ފޯރުކޮށްނުދިނުމުގެ 2 މައްސަލަ؛ ތަޢުލީމްފޯރުކޮށްނުދިނުމާ ގުޅޭ 1 މައްސަލަ އަދި އުފަންދުވަހުގެ ސެޓްފިކެޓް ނުހެއްދުމުގެ 1 މައްސަލަ ހިމެނެއެވެ.
ވަކި ޖިންސަކަށް ވީތީ ކުރާ އަނިޔާ އަދި ގެވެށި އަނިޔާ
- ވަކި ޖިންސަކަށް ވީތީ ކުރާ އަނިޔާ އަދި ގެވެށި އަނިޔާގެ 44 މައްސަލަ ވަނީ މިނިސްޓްރީއަށް ހުށަހަޅާފައެވެ. މިއީ، މާޗް 2017ގައި ރިޕޯޓްކޮށްފައިވާ މައްސަލަތަކުގެ 15%އެވެ.
- މިފަދަ މައްސަލަތަކުގެ ތެރެއިން އެންމެ ގިނައިން ރިޕޯޓްކޮށްފައިވަނީ އެކި ބާވަތުގެ ޖިސްމާނީ އަނިޔާގެ މައްސަލަތަކެވެ. މީގެ ތެރެއިން 21 މައްސަލައަކީ ޖިސްމާނީ އަނިޔާގެ ޝިކާރައަކަށްވެފައިވާ އަންހެނުންނާ ގުޅޭގޮތުން ހުށަހަޅާފައިވާ މައްސަލަތަކެވެ.
- މީގެ އިތުރުން މިބާވަތުގެ މައްސަލަތަކުގެ ތެރޭގައި ނަފްސާނީ އަނިޔާގެ 10 މައްސަލަ؛ ޖިންސީ އަނިޔާގެ 4 މައްސަލަ؛ އިހުމާލުވުމުގެ 2 މައްސަލަ އަދި ބިރުދެއްކުމުގެ 2 މައްސަލަ ހިމެނެއެވެ.
ނުކުޅެދުންތެރިކަން ހުންނަ ފަރާތްތަކާއި ދޮށީ އުމުރުގެ މީހުންނަށް އަޅާލުމާއި އެހީތެރިކަން
- ނުކުޅެދުންތެރިކަން ހުންނަ ފަރާތްތަކާއި ދޮށީ އުމުރުގެ މީހުންނަށް އަޅާލުމާއި އެހީތެރިކަން ފޯރުކޮށްދިނުމާއި ގުޅޭ 11 މައްސަލަ މާޗް 2017ގައި މިނިސްޓްރީއަށް ވަނީ ހުށަހަޅާފައެވެ.
- މިފަދަ މައްސަލަތަކުގެ ތެރޭގައި ދޮށީ އުމުރުގެ މީހުންނަށް އަޅާލުމާއި އެހީތެރިކަން ފޯރުކޮށްދިނުމާ ގުޅޭ 7 މައްސަލަ އަދި ނުކުޅެދުންތެރިކަން ހުންނަ ފަރާތްތަކަށް އަޅާލުމާއި އެހީތެރިކަން ފޯރުކޮށްދިނުމުގެ 4 މައްސަލަ ހިމެނެއެވެ.
އަމިއްލަ ނަފްސަށް ގެއްލުން ދިނުން
- އަމިއްލަ ނަފްސަށް ގެއްލުންދިނުމާ ގުޅޭ 6 މައްސަލަ މިނިސްޓްރީއަށް ވަނީ ރިޕޯޓްކޮށް އެޓެންޑްކޮށްފައެވެ.
30 އޭޕްރިލް 2017